Ir ao contido

Concello de Abegondo

 
avanzada
inicio | mapa web | contacto |

Accesos Rápidos

Abegondo completa a renovación de mananciais públicos para asegurar a calidade da auga, aínda utilizada para beber por moitos veciños

A fonte de Vilanova foi reconstruída e acondicionada a petición da asociación de residentes. Santiso destaca a modernización dos espazos lograda.

Imaxes

Abegondo, 23 de abril de 2012. A mellora na calidade das augas é un dos principais obxectivos do programa LIFE+ Aqua Plann. Ademais de actuacións de ampliación do sistema de depuración e saneamento do municipio, o plan europeo inclúe accións para asegurar a calidade da auga en contornos como os mananciais que a día de hoxe se seguen utilizando como fonte de abastecemento por parte de moitos veciños.

Neste marco inclúese unha actuación de recuperación da calidade e seguridade da potabilidade dos mananciais públicos no municipio, que realizou o Concello.

O goberno local que preside José Antonio Santiso impulsou o acondicionamento de varias fontes públicas e un manancial. As fontes encóntranse nos lugares de Vilanova, Vilardel, Outeiro, Presedo e San Antonio de Beldoña, e o manancial de uso veciñal, que abastece a 18 vivendas da Fraga, en Vizoño.

Os traballos, emprendidos por Augas de Galicia (socio do programa LIFE+ Aqua Plann xunto con Emalcsa, Medio Rural e o Concello), completáronse e as fontes xa ofrecen unha aparencia "modernizada e estética", apunta o alcalde.

A fonte de Vilanova foi unha das primeiras en verse completamente cambiada e unha das que máis o requiría. De feito, foi reconstruída totalmente. A obra foi incluída polo alcalde por petición da Asociación de Veciños de Santa Eulalia.

Agora, Santiso gaba o resultado dos traballos. "As fontes e mananciais teñen un posto de cabeza nos bens patrimoniais dun Concello tan marcado pola auga", afirma, e por iso considera apropiado a realización da obra. "O programa LIFE  estanos dando moitas cousas, como novas depuradoras ou redes de saneamento, pero tamén apostamos por melloras nas captacións máis pequenas pero que seguen tendo relevancia para moitos veciños", asegura.

O alcalde valora que o resultado da actuación sexan unhas "fontes renovadas, con enorme beleza e cunha auga mellor".

A actuación requiriu o investimento de 84.000 euros. O obxectivo perseguido consistiu en garantir a calidade de auga destas captacións que presentan un importante nivel de uso.

As actuacións acometidas foron as seguintes:

  • Limpeza e desinfección das instalacións
  • Limpeza e roza do contorno das fontes
  • Substitución dos canos que se encontraban en mal estado
  • Demolición e reconstrución en granito da fonte de Vilanova na súa totalidade
  • Limpeza de gabias e construción de gabias para evitar que a escorrentía superficial inundase as zonas de captación en Vilanova e Vilardel respectivamente
  • Demolición e reconstrución da arqueta da fonte de Outeiro

No caso do manancial, os traballos consistiron en:

  • Substitución da arqueta de conexión da captación de Vizoño que queda situada entre 15 e 20 m augas debaixo da súa posición actual
  • Perforación dunha sondaxe horizontal na zona de captación de Vizoño, incluíndo a preparación do terreo previa á perforación e o acondicionamento da sondaxe para o seu uso
  • Cerramento das zonas de captación en Vilardel e Vizoño

De cara a asegurar a calidade da auga, realizaranse análise químicos e bacteriolóxicos de mostras de auga das captacións seleccionadas para o control e seguimento a medio prazo. Realizaranse 4 mostraxes e os seus correspondentes análise equiespaciados no período entre a finalización das obras e a finalización de 2012.

 

O proxecto Aqua Plann

Aqua Plann consiste nun plan de acción sobre as presións que actúan sobre a conca dos ríos Mero e Barcés que pretende garantir a calidade das augas do L.I.C. Encoro Abegondo-Cecebre.

A fin perseguida é profundar na aplicación da directiva marco da auga (dma). Para iso, preténdese concentrar un gran número de recursos técnicos e humanos nun pequeno ámbito de actuación. Deste modo, obtense información e metodoloxías extrapolables a outras demarcacións.

Os principais axentes involucrados na súa xestión son: Concello de Abegondo, Emalcsa, Aguas de Galicia e Consellería de Medio Rural. Este plan foi aprobado pola Comisión Europea, achegando un terzo do investimento total.

Concello de Abegondo

Tfno. Centraliña: 981 647 909 | Enderezo: San Marcos, 1. 15318 Abegondo (A Coruña)